एक अविस्मरणीय प्रवास आणि नव्या वाटचालीची सुरुवात

दि. २२ ऑगस्ट २०२३ – माझा वाढदिवस, आणि त्याच दिवशी माझ्या आयुष्यातील एका नव्या टप्प्याची सुरूवात झाली. वाडा नगरपंचायतीमध्ये माझी नियुक्ती कंत्राटी कर्मचारी या पदावर झाली आणि तेथून एका नव्या प्रवासाची गाथा सुरू झाली. माजी कर अधिक्षक विवेक घायवट सर यांच्या मार्गदर्शनाखाली मी पहिल्यांदा कामाला सुरुवात केली. काही दिवसांनी त्यांची बदली शहापूर नगरपंचायतीमध्ये झाली, पण त्यांनी दाखवलेला विश्वास आणि दिलेलं संधीचं व्यासपीठ मी कधीच विसरू शकणार नाही.

प्रारंभी माझ्यावर घरपट्टी व पाणीपट्टी बिल बनवणे व थकबाकीदारांना नोटीस देण्याचं काम होतं. ही कामगिरी करताना केवळ दस्तऐवजांमध्ये रमणं नाही, तर नागरिकांशी थेट संपर्क साधत त्यांच्या अडचणी समजून घेणं आणि त्या सोडवण्याचा प्रयत्न करणं – ही खरी शिकवण होती.

सध्याच्या कर निर्धारण व प्रशासकीय अधिकारी श्रीम. पायल मॅडम, मुख्याधिकारी श्री. मनोज पष्टे सर आणि शहर समन्वयक श्री. विकास दडस सर यांचे सतत मार्गदर्शन लाभले. त्यांच्या मार्गदर्शनामुळे कार्यालयीन प्रक्रियेतील बारकावे समजले आणि अधिक जबाबदारीने काम करता आलं.

ऑफिसमधील इतर कर्मचारी, शिपाई वर्ग यांनी वेळोवेळी दिलेली मदत आणि त्यांच्या सहकार्यामुळे कामाचा ताण कधी जाणवला नाही. ऑफिस ही केवळ नोकरीची जागा नव्हती, तर ती एक कुटुंबासारखी वाटू लागली होती.

वाडा नगरपंचायतीत काम करताना विविध योजना हाताळण्याचा अनुभव आला – दिव्यांग योजना, प्रधानमंत्री स्वनिधी योजना, मुख्यमंत्री लाडकी बहीण योजना यांमध्ये फॉर्म भरून देणं, नागरिकांच्या शंका दूर करणं, कागदपत्रं गोळा करणं आणि त्यांना योजना मिळवून देण्यासाठी झटणं – यातून समाजसेवेचा खरा आनंद मिळाला. विशेषतः "लाडकी बहीण योजना" कार्यान्वित करताना सायली मॅडम, सचिन रसाळकर सर, स्नेहा पाटील, भाग्यश्री ताई आणि नम्रता गायकवाड यांच्यासोबत काम करताना अनेक स्त्रियांच्या जीवनात थोडं का होईना, बदल घडवण्याचं समाधान मिळालं.

माझ्या फोटोग्राफी आणि व्हिडिओग्राफीच्या कौशल्याचा उपयोग करत, अनेक बॅनर डिझाईन, सार्वजनिक कार्यक्रमांचे कव्हरेज, आणि सोशल मिडिया हँडलचे व्यवस्थापन करण्याची संधी मिळाली. हे सर्व करताना प्रशासनाच्या माध्यमातून सर्जनशीलतेलाही वाव मिळाला.

...आणि १ जून २०२५ पासून, मी नव्या विभागात – आस्थापना विभागात काम करत आहे. कर विभागातील आठवणी आता फक्त मागे वळून पाहताना येतात, पण त्या आठवणी माझ्या व्यक्तिमत्वाचा आणि अनुभवाचा अमूल्य भाग आहेत. नव्या विभागात नव्या जबाबदाऱ्या आहेत, पण जुना अनुभव पाठीशी आहे.

या विभागातील कामकाज अधिक तांत्रिक व जबाबदारीचं असलं, तरी मला योग्य मार्गदर्शन आणि मदतीची साथ लाभली. श्रीमती पूजा पाटील मॅडम यांनी सेवापुस्तक तयार करणं, वेतन निश्चिती आदेश कसा तयार करावा, त्यासाठी आवश्यक माहिती,कागदपत्रे व प्रक्रिया काय असते – हे अत्यंत संयमाने आणि बारकाईने शिकवलं. त्यांचं मार्गदर्शन म्हणजे या नव्या कामातील माझं दिशादर्शन ठरलं.

त्याचबरोबर, सचिन रसाळकर सर हे माझ्यासाठी प्रत्येक वेळेला, प्रत्येक अडचणीत खंबीरपणे उभे राहतात. एखादं तांत्रिक काम अडल्यास, कागदपत्रात शंका निर्माण झाल्यास किंवा नवीन प्रक्रिया समजून घ्यायची असेल – त्यांचा आधार नेहमीच मिळतो. त्यांच्या अनुभवाचा आणि सहकार्याचा उपयोग माझ्या कामाच्या गुणवत्तेला अधिक बळकटी देतो आहे.

या दोघांमुळे आस्थापना विभागातील माझं काम अधिक प्रभावी, शिस्तबद्ध आणि शिकण्यासारखं बनलं. त्यांनी दिलेलं मार्गदर्शन आणि पाठिंबा माझ्या प्रशासकीय वाटचालीसाठी एक अमूल्य ठेवा ठरतोय.

हा संपूर्ण काळ केवळ नोकरी करण्यापुरताच मर्यादित नव्हता. इथे माणसं जोडली गेली, अनुभव मिळाले, आणि समाजासाठी काहीतरी योगदान देता आलं.

नगरपंचायतीमध्ये काम करताना मिळालेलं ज्ञान, शिकवण, आणि लोकांशी जोडलेलं नातं – हे सगळं माझ्या पुढच्या वाटचालीसाठी एक भक्कम पाया ठरला आहे.

या प्रवासातील प्रत्येक क्षण माझ्यासाठी अमूल्य आहे. भविष्यातही हे अनुभव सोबत घेऊन अधिक चांगलं काम करायचं आहे. अधिक लोकांपर्यंत पोहोचायचंय आणि प्रशासनात असूनही माणुसकी जपायची आहे – हीच माझी खरी जिद्द.

विवेक घायवट सर, श्रीम.पायल मॅडम, विकास सर यांनी दिलेल्या त्या पहिल्या संधीपासून ते आस्थापना विभागात श्रीम.पूजा पाटील मॅडम आणि श्री. सचिन रसाळकर सरांच्या मार्गदर्शनापर्यंत – माझा प्रत्येक टप्पा हा शिकण्याचा आणि माणसं जोडण्याचा ठरला आहे. पायल मॅडम, मुख्याधिकारी श्री. पष्टे सर, विकास सर यांसारख्या वरिष्ठांनी दाखवलेला विश्वास आणि सहकाऱ्यांनी दिलेलं आपलेपण यामुळेच कार्यालय हे केवळ चार भिंतींचं ठिकाण न राहता, एक कुटुंब बनलं.

कर विभागातील काम करताना अनुभवलेली जबाबदारी आणि आस्थापना विभागात शिकत असलेली शिस्त – हे सगळं मला एका चांगल्या, जबाबदार कर्मचाऱ्याच्या दिशेने नेतंय.

आज मी इथे आहे, कार्यालयाच्या एका महत्त्वाच्या भागासारखा आणि उद्या याच अनुभवांच्या जोरावर समाजासाठी आणखी काही चांगलं करण्याच्या दिशेने पावलं उचलणार आहे.

कारण ही वाट चालतच राहणार आहे – शिकत, जोडत आणि समाजासाठी आपलं वेळ देत.

Also read- https://buskaashik.blogspot.com/2025/05/blog-post_38.html